Barbón diz que sedrá "contundente" con midíes de confinamientu énte un brote

Refuga cualquier "mensaxe triunfalista" porque "hai brotes en toes partes"

El presidente del Principáu, Adrián Barbón, alvirtió esti martes de que sedrá "contundente" nel casu de que surda un brote de coronavirus pa evitar el contaxu comunitariu con midíes qu’inxertaríen confinamientos selectivos.

"Confinaría lo que ficiere falta", dixo Barbón nuna entrevista n’Antena 3 al entruga-y por si optaría por confinamientos selectivos como l’afitáu nun edificiu de Santander dempués de la detección de catorce contaxos.

Barbón recalcó que, énte l’apaición d’un brote, lo importante ye controlalu pa evitar que se produza un contaxu a nivel comunitariu y por ello sedrá "contundente".

El xefe del Executivu asturianu valoró que’l Principáu convirtióse na primer comunidá autónoma n’encadenar dos selmanes ensin nuevos contaxos de COVID-19.

Sicasí, refugó cualquier "mensaxe triunfalista" porque "hai brotes en toes partes" y "tarde o temprano habrálo de xuru n’Asturies", alvirtió.